Os datos de afiliacións á Seguridade Social no segundo trimestre de 2018 amosan unha clara melloría nos mercados de traballo de ámbeto municipal na provincia de Ourense. En só tres meses, a cifra de concellos xeradores de emprego neto pasou de 48 a 78, dato que representa un crecemento do 62,5%. Dúas comarcas -O Ribeiro e A Baixa Limia- teñen todos os seus municipios creando emprego, e nunha terceira -Verín-, non se rexistra ningunha perda de emprego a nivel municipal (únicamente Vilardebós non tivo auxe de afiliacións no segundo trimestre, ao repetir a mesma cifra do trimestre anterior). Entre os trece concellos que perden afiliados, só Chandrexa de Queixa se desmarca cunha caída do 8,6% en taxa interanual. Os demais descensos son moito máis moderados, ao oscilar entre unha baixada do 0,3% en Vilar de Barrio e do 2,5% en Carballeda de Valdeorras.
As doce cabeceiras de comarca son creadoras de emprego neto, con protagonismo especial para Ribadavia (6,4% de incremento en taxa interanual), Celanova (4,8%) e Pobra de Trives (4,6%). Outras catro capitalidades locais sobrepasan o 3% de crecemento: Allariz (3,9%), Verín (3,6%), O Carballiño (3,4%) e Xinzo de Limia (3,3%). Máis moderados son os rexistros de Bande (0,5%), Castro Caldelas (0,5%), O Barco de Valdeorras (1,6%), Viana do Bolo (2,7%) e Ourense (2,9%). Catro concellos ourensáns anotan incrementos das afiliacións a dobre díxito no último ano. Son Quintela de Leirado (11%), Punxín (10,6%), Porqueira (10,2%) e Cualedro (10,1%). Outros rexistros moi salientables en rexeneración laboral son os de Melón (9,9%), Castrelo do Val (9,4%), Baltar (8,5%), A Mezquita (7,3%), Vilamarín (6,7%), Muiños (6,6%), Carballeda de Avia (6,6%) e O Blancos (6,6%).
Na comparativa intertrimestral (segundo trimestre de 2018 fronte a primeiro de 2018), baixan as afiliacións en 21 municipios da provincia, pero con valores cativos que oscilan entre un afiliado menos en Lobeira, Boborás, Leiro ou A Gudiña e 13 afiliacións menos en Viana do Bolo. Dase a circunstancia de que hai pleno de diminucións nos catro municipios da comarca de Viana, si ben entre todos só estreitaron o mercado laboral no trimestre en 27 empregos (o 1,5% do total).